تیونس:النہضہ مخلوط حکومت میں شمولیت کے لیے تیار

تیونس:2 فروری(آئی این ایس انڈیا)
تیونس کی اعتدال پسند اسلامی جماعت النہضہ نے اپنی سیاسی حریف سیکولر جماعت نداتیونس کی قیادت میں نئی مخلوط حکومت میں شمولیت پر آمادگی ظاہر کردی ہے۔
النہضہ کے قائد راشد الغنوشی نے ایک نیوزکانفرنس کے دوران قومی اتحاد کی حکومت میں شمولیت کا اعلان کیا ہے۔گذشتہ ہفتے پارلیمان کی بڑی جماعتوں نے نامزد وزیراعظم حبیب الصید کی قیادت میں نئی کابینہ میں شامل



بیشتر وزراء کو مسترد کردیا تھا اور ان کی کابینہ کی منظوری نہیں دی تھی جس کے بعد اب ندا تیونس اور النہضہ کے درمیان مخلوط حکومت کے قیام پر اتفاق راِئے ہوا ہے۔
واضح رہے کہ گذشتہ سال اکتوبر میں منعقدہ پارلیمانی انتخابات میں نداتیونس نے سب سے زیادہ چھیاسی نشستیں جیتی تھیں۔ اس جماعت کے سربراہ الباجی قائد السبسی دسمبر کے آخر میں منعقدہ صدارتی انتخابات کے دوسرے مرحلے میں ملک کے صدر منتخب ہوئے تھے۔